Կուսակցության կանոնադրությունը

«Օրինաց երկիր» կուսակցությունը, այսուհետ կուսակցություն, գործում է ՀՀ Սահմանադրության, «Կուսակցությունների մասին»  ՀՀ օրենքի և ՀՀ իրավական ակտերի համապատասխան` ղեկավարվելով սույն կանոնադրությամբ, իր գաղափարական  սկզբունքներով և ծրագրով:

«Օրինաց երկիր» կուսակցությունը, սույն կանոնադրության համաձայն, իր գրանցման պահից իրավաբանական անձ է, ունի իր խորհրդանշանով կլոր կնիք: Խորհրդանշանը պատկերում է շրջան, որի վերևի մասում հավերժության խորհրդանիշն է, և «Օրինաց երկիր»  բառերը, իսկ ներքևի մասում` «Կուսակցություն» բառը, կենտրոնական մասում գրված են ՕԵԿ տառերը, Ե տառի վերևում Արարատ լեռն է: Խորհրդանշանի պատկերը ներկայացված է կանոնադրության հավելվածում: Կուսակցությունն ունի դրոշմակնիք, հաշվարկային և այլ հաշիվներ բանկերում` ՀՀ դրամով և արտարժույթով, այլ ռեկվիզիտներ:

Կուսակցության անվանումն է.

Հայերեն` «Օրինաց երկիր» կուսակցություն /Հապավումը` ՕԵԿ/

Ռուսերեն` Партия  «Правовая страна»

Անգլերեն` Party of  «Country of legality»

Իրավաբանական հասցեն է` ՀՀ, ք. Երևան, Կորյունի 14, հեռ.526939:

Կուսակցության նպատակները 

1.  Մարդու ազատ, անվտանգ, բարեկեցիկ ու արժանապատիվ ապրելու և իր իրավունքների իրականացումն ապահովելու համար իրավական, սոցիալական, ժողովրդավարական, աշխարհիկ պետության կերտումը և քաղաքացիական հասարակության հետ ներդաշնակ զարգացման ապահովման աջակցությունը:

2.  Ազգային արժեքների վրա խարսխված սոցիալական համերաշխության, հանդուրժողականության և գործընկերության հենքով բաց հասարակության ստեղծումը:

3.  Հայ ժողովրդի ստեղծագործական, մտավոր և տնտեսական ներուժի միավորումը, արդիականացող աշխարհում համազգային շահեր իրականացնող տնտեսական հզոր, քաղաքակիրթ, զարգացած և միջազգային ասպարեզում մրցունակ պետության կերտումը, ազգային անվտանգության ապահովման աջակցությունը:

Կուսակցության խնդիրները

Վերոշարադրյալ նպատակների իրականացման համար կուսակցությունը հետամուտ է լինելու հետրյալ խնիդրների լուծմանը`

1.   Ստեղծել հավասարակշված, ընդգծված սոցիալական բևեռացումը բացառող հանրային կառուցակարգեր.

2.  Մեծացնել  պետական իշխանության հոգածությունը սոցիալական ապահովության, առղջապահության, կրթության ոլորտներում.

3.  Սոցիալապես անպաշտպան խավերի, անաշխատունակ խմբերի անհրաժեշտ կենսամակարդակի ապահովման համար օրենսդրական և ինստիտուցիոնալ բարեփոխումների ճանապարհով  պայմանների ստեղծում.

4.   Ազատ շուկայական տնտեսության սկզբունքների, ներդրումների հուսալի իրավական պաշտպանվածության վրա խարսխված, սեփականության բազմաձևության և սեփականության բոլոր ձևերի հավասար իրավական պաշտպանության  հիմնված տնտեսական արդյունավետ համակարգի ստեղծում.

5.  Արդյունավետության վերականգնումը, վերագործարկումը բարձր տեխնոլոգիաների վրա հիմնված, արտահանողական ուղղվածությամբ, նոր աշխատատեղեր ապահովող արդյունաբերության ստեղծումը և կայուն զարգացումը, գյուղատնտեսության նկատմամբ պետական հոգածության բարձրացումը.

6.  Գործուն պետական, հասարակական և իրավական մեխանիզմեների ստեղծման, գործարար և մշակութային կապերի ակտիվացման ճանապարհով Հայաստան-Սփյուռք-Արցախ ներուժի համախմբումը.

7.  Օրենքի գերակայության վրա հիմնված իրավական պետությունում անհրաժեշտ օրենսդրական և ինստիտուցոնալ հիմք ունեցող քաղաքական և իրավական ինստիտուտների ձևավորումը և աստիճանական զարգացումը.

8.  Դատաիրավական համակարգի անկախության և դերի բարձրացումը, արդարադատության իրականացման համար հաստատուն երաշխիքների ստեղծումը.

9.  Մարդու և քաղաքացու իրավունքների և ազատությունների պաշտպանության օրենսդրական և ինստիտուցիոնալ արդյունավետ կառուցակարգերի  ստեղծումը.

10.  Մարդու, նրա կարողությունների ազատ ու անարգել դրսևորման համար իրավական, քաղաքական, տնտեսական, սոցիալական, մշակութային և հոգևոր անհրաժեշտ պայմանների ապահովումը.

11.  Իշխանության երեք թևերի` օրենսիր, գործադիր, դատական, կայուն զարգացումը և նրանց միջև համագործակցության ու փոխադարձ հակակշռման ապահովումը.

12.  Հարկատուների շահերի պաշտպանությունը, տնտեսվարողների համար գործունեության հավասար պայմանների ապահովումը.

13.  Տեղական ինքնակառավարման զարգացումը, պետական կառավարման հետ ներդաշնակ գոյակցումը.

14.  ԶԼՄ-ների` որպես հանրային իշխանության միջոցի, ազատ զարգացմանն աջակցությունը.

15. Ազգային բանակի մարտունակության բարձրացումը և նրա մտավոր, կազմակերպչական, տեխնիկական ներուժի զարգացմանն աջակցությունը.

16. Նպաստել մտավորականության` որպես ազգային ոգու կրողի  ներգրավմանը պետական և հասարակական գործընթացներ, համախմբել նրանց ներուժը համազգային խնդիրների լուծման շուրջ.

17. Պետական ինքնիշխանության ապահովման նպատակով ռազմավարական ոլորտներում պետական սեփականության պահպանումը.

18. Քաղաքացիական ակտիվության և մասնակցության բարձր մակարդակի ապահովումը.

19. Ներգրավումը համաշխարհային ինտեգրացիոն գործընթացներում` ապահովելով ազգային նկարագրի և ավանդույթների պահպանումը.

20. Հատուկ ուշադրություն դարձնել հոգեպես և ֆիզիկապես առողջ սերնդի դաստիարակությանը, տաղանդավոր երիտասարդների բացահայտմանն ու խրախուսմանը, բարձրացնել երիտասարդության քաղաքացիական ակտիվությունը.

21. Անզիջում պայքարել տնտեսության մեջ ստվերայնության, կլանների, պետական կառավարման ապարատում կոռուպցիայի և Հայաստանի զարգացմանը խոչընդոտող այլ երևույթների դեմ:

 Կուսակցության գործելակերպը

Իր գաղափարական և ծրագրային դրույթներն իրագործելու համար կուսակցությունը որդեգրում է հետևյալ գործելակերպը`

1.  Կուսակցության անդամ հանդիսացող պատգամավորների կողմից իրականացվող օրենսդրական նախաձեռնությունների միջոցով հասնել օրենսդրական և ինստիտուցիոնալ բարեփոխումների, նպաստել ժողովրդավարական ինստիտուտների ձևավորմանն ու կայացմանը, համապատասխան օրենքների ընդունմանը.

2.  Առաջարկություններով, հայտարարություններով, զանգվածային լրատվության և այլ միջոցներով արտահայտված ակտիվ դիրքորոշմամբ հասնել պետության զարգացմանը խթանող և մարդկանց սոցիալական վիճակը բարելավող օրենքների և այլ իրավական ակտերի ընդունմանը.

3.   Ընտրովի մարմիններում և այլ պաշտոններում աշխատող կուսակցության անդամների աշխատանքային և կուսակցական գործունեության  նկատմամբ իրականացնել մշտական վերահսկողություն.

4.   Հանրապետության ներսում և արտասահմանում իրականացնել ազգային արմատների, արժեքների մշակույթի ակտիվ քարոզչություն և տարածում, ամեն կերպ պահպանել և քաջալերել ազգային ավանդույթները, անզիջում պայքարել ազգի ինքնությանն ու բարոյականությանը վնասող նորամուծությունների դեմ.

5.   Աշխուժացնել և առավել գործնական դարձնել Հայաստան-Սփյուռք-Արցախ կապերն ու համագործակցությունն ապահովող կառույցների գործունեությունը: Ջանքեր գործադրել դիվանագիտության մեջ և տեղեկատվական «պատերազմում» իրականացնելու մշտական  ակտիվ գործելակերպ: Դիվանագիտական, մշակութային օժանդակություն ցուցաբերել արտերկրում բնակվող  էթնիկ հայերին , աջակցել նրանց շահերի պաշտպանությանը.

6.   Ունկնդրելով ժողովրդի ձայնը և որդեգրած լինելով ակտիվ դիրքորոշում` մշտապես հանդես գալ  ժողովրդի սոցիալական շահերի պաշտպանությամբ, ակտիվացնել պայքարը բյուրոկրատական կամայականությունների դեմ.

7.  Նպաստել Հայաստանում արտահանողական ուղղվածության արդյունաբերության  և գյուղատնտեսության, միջազգային  մակարդակով  ճանաչում գտնելու ընդունակ մտավոր ծառայությունների զարգացմանը:

Կուսակցության կազմակերպչական կառուցվածքը և կառավարումը

Կուսակցությունը կազմված է  սկզբնական, համայնքային, տարածքային և մարզային կազմակերպություններից:  Անհրաժեշտության դեպքում կուսակցությունը կարող է ձևավորել միություններ և աշխատանքային մարմիններ, որոնց կազմը և քանակը սահմանվում է կուսակցության համապատախան մարմինների կողմից: Կուսակցության մարզային կազմակերպությունները հանդիսանում են կուսակցության մասնաճյուղրեր:

Կուսակցության սկզբնական կազմակերպություններն ստեղծվում են կուսակցության առնվազն 5 անդամների առկայության դեպքում: Սկզբնական կազմակերպության բարձրագույն զեկավար մարմինն ընդհանուր ժողովն է, որն իրավազոր է անդամների 2/3-ի ներկայության դեպքում: Ժողովի որոշումներն ընդունվում են մասնակիցների թվի կեսից ավելի ձայներով:  Ժողովները տեղի են ունենում ոչ պակաս, քան տարին 2 անգամ` սեփական ժամանակացույցի համաձայն:

Կուսակցության համայնքային  կազմակերպություններն  իրենց մեջ միավորում են սկզբնական      կազմակերպությունները: Համայնքային կազմակերպության ղեկավար մարմիններն են ` համայնքային կազմակերպության  ընդհանուր ժողովը, նախագահը և խորհուրդը: Համայնքային կազմակերպության ընթացիկ ղեկավարումը ժողովների միջև ընկած ժամանակահատվածում կատարվում է խորհրդի կողմից, որը բաղկացած է 15 անդամներից:

Կուսակցության տարածքային   կազմակերպություններն  իրենց մեջ են ընդգրկում համայնքային կամ սկզբնական կազմակերպությունները: Տարածքային կազմակերպության ղեկավար մարմիններն են ` ընդհանուր ժողովը և խորհուրդը: Տարածքային կազմակերպության ընդհանուր ժողովն անց է կացվում ոչ պակաս, քան տարին մեկ անգամ:

Կուսակցության մարզային   կազմակերպությունները  իրենց մեջ են միավորում տարածքային կազմակերպությունները: Մարզային կազմակերպության ղեկավար մարմինը մարզային համաժողովն է /կոնֆերանս/, որն անցկացվում է որ պակաս, քան տարին մեկ անգամ: Համաժողովի պատվիրակների թիվը որոշվում է մարզային խորհրդի կողմից` ըստ սկզբնական կազմակերպությունների անդամների թվի: Համաժողովը իրավազոր է, եթե  ներկա են պատվիրակների 2/3-ը , որոշումներն ընդունվում են ձայների պարզ մեծամասնությամբ:

Կուսակցության ղեկավար մարմինները

 Կուսակցության ղեկավար մարմիններն են` կուսակցության համագումարը, քաղաքական խորհուրդը, վարչությունը և կուսակցության նախագահը: