<<Սուրբ օրենքների երկիր>>  կամ <<Օրինաց երկիր>>` այսպես  էին կոչում Հայաստանը այն  ժողովուրդները, որոնք հարևան էին Հայոց  աշխարհին:                  

    1997թ. հիմնադրելով <<Օրինաց երկիր>> կուսակցությունը` Արթուր Բաղդասարյանը և նրա շուրջ համախմբված գաղափարական և քաղաքական համախոհները նպատակ ունեին Հայաստանում վերականգնել նախնյաց ավանդույթները: Կուսակցության ղեկավարը, լինելով իրավաբան, լավ էր գիտակցում պետության զարգացման գործում օրենքի գերակայության հաստատաման անհրաժեշտությունը, օրենք, որի կենտրոնում կանգնած է մարդը` նրա իրավունքների և ազատությունների պաշտպանությունը, պետության  և  հասարակության  անվտանգությունը, ազգային  արժեքների հարատևումը:

<<Օրինաց երկիր>>կուսակցության ստեղծումը արձագանքն էր նաև հասարակության այն զգալի  հատվածի  պահանջի, որը ցանկանում էր երկրի կառավարումը խարսխված տեսնել իրավական օրենքների վրա: 

Կուսակցությունը ստեղծվեց և հայ քաղաքական ասպարեզ  իջավ պատմական այնպիսի ժամանակահատվածում, երբ հայ պետական և հասարակական կյանքի գրեթե բոլոր ոլորտներում տեղի էին ունենում ռազմավարական բնույթի քաղաքական գործընթացներ (1997-ից մինչև 2010թթ. ընկած ժամանակահատվածում Հայաստանը անդամակցել է Եվրոպայի խորհրդին, դարձել է Առևտրի համաշխարհային կազմակերպության անդամ, ընդունել է նոր Սահմադրություն, միացել է Բոլոնյան համաձայնագրին, մշակվել և ընդուվել է ՀՀ ազգային անվտանգության հայեցակարգը, իրականացվել են սոցիալ-տնտեսական, դատաիրավական և այլ ոլորտների փոփոխություններ), որոնց <<Օրինաց երկիր>> կուսակցությունը իր լուրջ  և արդյունավետ մասանակցությունն է ունեցել` մշտապես  օբյեկտիվորեն գնահատելով իրականությունը և բացասական զարգացումների քննադատության հետ միաժամանակ` առաջարկել իրատեսական լուծումներ:

Գիտակցելով վերը նշվածի կարևորությունը և, որպես քաղքական ուժ, իր պատասխանատվությունը հայրենիքի ու ժողովրդի առջև` <<Օրինաց երկիր>> կուսակցության գաղափարախոսական հենքում դրվեցին հետևյալ կարևոր հիմնադրույթները.

• մարդակենտրոն օրենսդրություն,

• ռեֆորմներ և աջակցություն նոր և մրցունակ  գաղափարներին,

• ազգային ներուժի բացահայտում,  ազգային մրցակցության ապահովում,

• ազգային արժեքների արժևորում և պահպանում,

• Հայաստանի  Հանրապետության արժանապատիվ  տեղի  ապահովումը  զարգացող  աշխարհում

Ժամանակն ապացուցեց, որ կուսակցության կողմից որդեգրված գաղափարական սկզբունքները ընդուվեցին և աջակցություն գտան հասարակության կողմից: 

Դեռևս 1999թ. նորաստեղծ կուսակցության առաջին լուրջ հայտը քաղաքականության մեջ խորհրդարանական ընտրություններին մասնակցությունն և 5%-ի արգելքի հաղթահարումն էր, ինչի  արդյունքում ԱԺ-ում ձևավորվեց <<Օրինաց երկիր>> խմբակցությունը:

Սկսած 1999թ.-ից կուսակցությունը ամրացրեց և խորացրեց ժողովրդի հետ իր կապերը, ապրեց քաղաքացու հոգսերով և հիմնախնդիրներով: ՀՀ-ում չկար ոչ մի համայնք, բնակավայր որտեղ այցելած չլինեին <<Օրինաց երկրի>> պատգամավորները Ա. Բաղդասարյանի գլխավորությամբ:

Մարդիկ վստահում էին ՕԵԿ-ին, դիմում կուսակցությանը և նրա նախագահին իրենց հիմնախնդիրների լուծման ակնկալիքով: 1999-2003թթ. ԱԺ ուղարկված դիմումների 44%-ը հասցեագրված էր ՕԵԿ-ին, այն դեպքում, երբ ԱԺ-ում <<Օրինաց երկիր>> խմբակցության պատգամավորների թիվը  չէր գերազանցում 5%-ը: 

Արդեն 2003 թ. մայիսի 25-ի ՀՀ ԱԺ ընտրություններում << Օրինաց երկիրը>> ստացավ ավելի քան 200.000 ձայն, կուսակցություն <<Հայաստանի հանրապետական>> և <<Հայ հեղափոխական դաշնակցություն>> կուսակցությունների հետ ձևավորեց խորհրդարանական կոալիցիա` առաջին անգամ մասնակցելով կառավարության ձևավորմանը: Կուսակցության նախընտրական ծրագրերի հիմնական դրույթները ներառվեցին կառավարության ծրագրում: Իսկ կուսակցության ղեկավար Արթուր Բաղդասարյանը, ընտրվելով ԱԺ նախագահի պաշտոնում, հայտարարեց, որ իշխանությունը իր և իր ղեկավարած քաղաքական ուժի համար նախ և առաջ պարտք ու պատասխանատվություն, մարդկանց օգնելու, նրանց կյանքում իրական բարեփոխումներ կատարելու հնարավորություն է:

2003-ից 2007թթ. ընկած ժամանակահատվածում ՕԵԿ-ի ակտիվ պայքարի արդյունքում տեղի ունեցան բազմաթիվ բարեփոխումներ:

Այս ընթացքում ՕԵԿ-ը մշտապես մնաց հաստատակամ իր սկզբունքներում. ճշմարտախոս, պայքարող, համարձակ, համակարգային և իրական բարեփոխումների կողմնակից:

Ելնելով  վերը  նշվածից, 2006թ.-ին ՕԵԿ-ը` արտահայտելով իր անհամաձայնությունը վարվող քաղաքականության մի շարք ուղղությունների նկատմամբ և բարձրաձայնելով առավել արագ և իրական բարեփոխումների հրամայականը դուրս եկավ կոալիցիայից, իսկ կուսակցության ղեկավարը հրաժարական տվեց ԱԺ նախագահի պաշտոնից: 

Կուսակցությունը  շարունակեց պայքարն ի պաշտպանություն իր կողմից առաջադրված արժեքների և գաղափարների: 

2007թ. մայիսի 12-ին տեղի ունեցած ՀՀ ԱԺ ընտրություններում ՕԵԿ-ը հերթական անգամ ստացավ ժողովրդի վստահության քվեն` ձևավորելով առավել ակտիվ և սկզբունքային խմբակցություններից մեկը: 

 Իսկ արդեն 2008թ.-ի  նախագահական  ընտրություններում  <<Օրինաց  երկիր>>  կուսակցության նախագահ  Ա.Բաղդասարյանը  ստացավ  ընտրողների  ավելի  քան  275.000  քվե, ինչը  հերթական  ապացույցն  էր  ժողովրդի  կողմից  նրա   անցած  ճանապարհի   գնահատականի:

Հայաստանյան ներքաղաքական կյանքին <<Օրինաց երկիր>> կուսակցությունը մասնակցում է այն անխախտ համոզմամբ,  որ կուսակցական մրցակցությունը պետք է դիտարկվի որպես երկրի ժողովրդավարական զարգացման հիմք`   հավատարիմ  մնալով իր  կարգախոսին` <<Քաղաքական  մրցակցություն  և  ոչ  քաղաքական  թշնամանք, քաղաքական  խաղաղություն  և  ոչ քաղաքական  պատերազմ>>:

Քաղաքական, ժողովրդավարական մրցակցության  փոխակերպումը  քաղաքական  պատերազմի, խարխլում  է  պետության  հիմքերը  և  հարված  հասցնում  երկրի  կայունությանը  և  անվտանգությանը: Դա  առավել  քան  արդիական  է  ՀՀ-ի  համար, քանզի  մենք  գտնվում  ենք  բարդ  տարածաշրջանում  և  մեր  ազգային  շահերի  ու  արժեքների  իրականացումը, ղարաբաղյան  հիմնախնդրի  լուծումը, մեր  հայրենիքի  անվտանգության  ապահովումը  պահանջում  է  մեր  հասարակությունից  համազգային  արժեքների  համատեղ  պաշտպանություն: 

Ուստի,  գիտակցելով պետական  և  հասարակական  կայունության  և  զարգացման  անհրաժեշտությունը, ինչպես  նաև, կարևորելով  նախագահական  ընտրություններում  Ա.  Բաղդասարյանի  նախընտրական  ծրագրի  կետերի  իրականացումը, Ա.  Բաղդասարյանը  և  Ս.  Սարgսյանը  ստորագրեցին   հուշագիր: ՕԵԿ-ը` ՀՀԿ-ի, ԲՀԿ-ի  և  ՀՅԴ-ի  հետ  ձևավորեց  կոալիցիա:

    2008թ.-ի  կոալիցիայի  ձևավորումից  մինչև այսօր` 2010 թ.-ը, ՕԵԿ-ը` համաձայն  Ա. Բաղդասարյանի  2008թ.-ի  նախագահական  ընտրությունների  նախընտրական  ծրագրի, հանդես  է  եկել  բազմաթիվ իրավական նախաձեռնություններով: 

ՕԵԿ-ի սկզբունքային դիրքորոշումն ազգային, պետական և հասարակական կյանքում իր արտացոլումն է գտել ՀՀ քաղաքական դաշտում, իր` բեղմնավոր և արդյունավետ օրենսդրական գործունեության ընթացքում:

Այսօր էլ տասներեքամյա <<Օրինաց երկիր>> կուսակցությունն իր առաջնորդի` Արթուր Բաղդասարյանի գլխավորությամբ, հաստատակամ է այն սկզբունքների և նպատակների իրականացման համար, որոնք Հայաստանը կդարձնեն  հիրավի օրինաց երկիր: